Drejtori i përgjithshëm i Policisë së Kosovës, kolonel Gazmend Hoxha me stafin e tij, vizitoi sot pikë kalimin kufitar në Jarinjë dhe familjen e rreshterit policor Afrim Bunjaku, i cili ra heroikisht në kryerje të detyrës në mbrojtje të sovranitetit territorial të Kosovës më 24 shtator në Banjska të Zveçanit.
Në emër të policisë, drejtori Hoxha gjatë kësaj vizite falënderoi familjen e heroit Bunjaku për sakrificën dhe kontributin e dhënë për shtetin e Kosovës, me ç ‘rast i siguroi ata se Policia e Kosovës do të jetë gjithmonë pranë tyre duke kujtuar heroizmin e Afrimit dhe duke ofruar mbështetjen e nevojshme për familjen e tij.
Familjes Bunjaku nga drejtori Hoxha iu dorëzua edhe një pllakat me emrin e heroit rreshter Afrim Bunjaku, e cila ishte dhuruar nga Shoqata shqiptaro-amerikane (AALEA US ), dedikuar për heroin e Kosovës.
“Policia e Kosovës do ta kujtojë përherë heroin Afrim Bunjaku dhe të gjithë heronjtë e tjerë, të cilët nuk kursyen jetën e tyre për qytetarët dhe vendin”, tha Hoxha.
Ndërsa gjatë vizitës në pikë kalimin kufitar Jarinjë, drejtori Hoxha takoi zyrtarët policorë, të cilët i falënderoi për punën e pakursyer dhe njëkohësisht kërkoi të vazhdojnë me përkushtim realizimin e detyrave në interes të sigurisë, parandalimit të krimit e kontrabandës, dhe menaxhimit sa më efikas të kufirit shtetëror.
