Kurti: Fotografitë e Goddard, dëshmi e gjallë e luftës në Kosovë

Kryeministri në detyrë Albin Kurti u ka bërë thirrje qytetarëve ta vizitojnë ekspozitën “The Kosovo War Photographs”, e cila është hapur në qendrën “Barabar” të Hotelit Grand.

Ekspozita përmbledh rreth 70 fotografi të luftës, të realizuara nga foto-reporteri Wade Goddard.

Në një postim në Facebook, Kurti tha se këto fotografi janë një përjetim i thellë dhe i dhimbshëm, që shërbejnë si kujtesë e gjallë përmes syrit të një dëshmitari. Ai theksoi se imazhet pasqyrojnë vuajtjet, dhimbjen dhe të vërtetën e luftës, duke përfaqësuar një kapitull thelbësor të historisë së Kosovës.

Sipas Kurtit, ekspozita nuk është vetëm një kujtim, por edhe një thirrje për drejtësi për viktimat e gjenocidit dhe spastrimit etnik të kryer nga regjimi serb në pranverën e vitit 1999.