Kryetari i Mitrovicës së Veriut shoqërohet në Polici

Kryetari i Mitrovicës së Veriut, Milan Radojeviq, së bashku me kryesuesin e Kuvendit Komunal, Ivan Zaporozaq, janë shoqëruar në Policinë e Kosovës, në një rast që lidhet me veprime të Inspektoratit Komunal.

Lajmi është konfirmuar për Gazetën Sinjali nga zëvendësdrejtori i Policisë për rajonin e veriut, Veton Elshani.

Sipas informacioneve, ngjarja ka ndodhur pasi Inspektorati Komunal ka shkuar në një lokacion në Mitrovicën e Veriut për heqjen e një tabele me mbishkrimin “E dua Mitrovicën”, e cila dyshohet se ka qenë subjekt i kontestimeve në terren.

Pas ndërhyrjes, dy zyrtarët komunalë janë shoqëruar në polici në kuadër të procedurave hetimore për dyshime lidhur me vandalizëm.

Ndërkohë, para stacionit policor në Mitrovicë të Veriut janë mbledhur anëtarë të Listës Serbe, ndërsa rasti po trajtohet nga organet kompetente.