Kryetari i Kuvendit të Kosovës, Glauk Konjufca, sot (e hënë) ka pritur në takim delegacionin e Norvegjisë në Asamblenë Parlamentare të Këshillit të Evropës (APKE), ku u bisedua për marrëdhëniet mes dy vendeve, me fokus vazhdimin e mbështetjes së shtetit norvegjez ndaj Kosovës në rrugën integruese euroatlantike.
Sipas komunikatws pwr media, anëtarët e delegacionit norvegjez në APKE, ofruan mbështetje për anëtarësim të Republikës së Kosovës në KiE dhe shprehën gatishmërinë për thellimin e bashkëpunimit të ndërsjellë.
Me delegacionin norvegjez i cili përbëhej nga Ingjerd Schou, Lise Christoffersen, Lisa Marie Klungland, Andreas Sjalg Unneland, Anita Helland Kjus dhe Eric Christensen, Konjufca bisedoi po ashtu për çështje të tjera në interes të vendit.
“Kryetari Konjufca e njoftoi delegacionin norvegjez në APKE lidhur me punët e deritashme, sfidat dhe të arriturat e kësaj legjislature. Gjithashtu i informoi në lidhje me hapat që Republika e Kosovës ka ndërmarrë për anëtarësim në Këshillin e Evropës. Kryetari i Kuvendit theksoi se Kosova është e gatshme t’i bashkohet Këshillit të Evropës, meqë i ka plotësuar të gjitha kriteret, duke bërë progres në të gjitha fushat, përfshirë sundimin e ligjit, respektimin e të drejtave të njeriut, si dhe ndërtimin e shtetit me standarde të larta demokratike”, thuhet në komunikatën për media.
“Anëtarët e delegacionit norvegjez në APKE, pasi e falënderuan Kryetarin e Kuvendit për pritjen, ofruan mbështetje për anëtarësim të Republikës së Kosovës në KiE dhe shprehën gatishmërinë për thellimin e bashkëpunimit të ndërsjellë”, thuhet po aty.
Kosova ka aplikuar për anëtarësim në këtë organizatë më 12 maj 2022. Ndërsa më 24 prill 2023, Komiteti i Ministrave me më shumë së 2/3 e votave ka votuar në favor të procedimit tutje të kërkesës për anëtarësim në KiE.
