Procesi gjyqësor ndaj ish-krerëve të Ushtrisë Çlirimtare të Kosovës ka hyrë tashmë në fazën vendimtare në Dhomat e Specializuara në Hagë.
Këtë të mërkurë pritet të dëgjohen fjalët e fundit nga përfaqësuesi i viktimave, replikat e mbrojtjes dhe në fund edhe deklarimet përmbyllëse të vetë katërshes së UÇK-së.
Në seancën përmbyllëse pritet të marrë pjesë zëvendëskryeministri i parë i Kosovës, Glauk Konjufca.
Konjufca dje tha se sot është Dita D, dhe se populli duhet të jetë i bashkuar, sikurse në marshin që u mbajt në Prishtinë.
“Nesër e kemi ditën D, ashtu siç ishim të bashkuar në Prishtinë, uroj që edhe nesër të jemi të bashkuar. Pikërisht për këtë arsye, po uroj që për shkak të këtij bashkimi dhe për shkak që kur është çështja te Ushtria Çlirimtare askush nuk mund të na përqajë, Gjykata ka me pa më qartë këtë unitet tonin dhe me marrë një vendim që është në përputhje me të vërtetën historike”.
Konjufca tha se është i bindur që Prokuroria nuk do të mund të vërtetojë me fakte asgjë, teksa deklaratën e Prokurorisë gjatë seancave të javës së kaluar, e cilësoi si skandaloze.
“Unë jam fort i bindur që kurgjë Prokuroria nuk ka me mujt me vërtetu me fakte, me deklarata politike ato janë tjera. Deklarata politike ka ba vazhdimisht, si kjo më skandalozja që ke që krejt botën e kanë mashtru kjo ndërmarrje kriminale e ashtuquajtur, ajo dmth ke me u tmerru prej sikleti”, tha Konjufca të martën.
Hashim Thaçi, Kadri Veseli, Jakup Krasniqi dhe Rexhep Selimi po përballen me akuza për krime lufte dhe krime kundër njerëzimit, të cilat sipas Prokurorisë së Specializuar, lidhen me periudhën e luftës në Kosovë, 1998–1999. Sipas aktakuzës, të akuzuarit dyshohet se kanë qenë pjesë e një “ndërmarrjeje të përbashkët kriminale”, akuza të cilat ata i kanë mohuar vazhdimisht, duke u deklaruar të pafajshëm.
