Itali: Foshnja e porsalindur rrëmbehet nga një çift në spital, prindërit përjetojnë tmerrin

Një ngjarje e rëndë ka tronditur një familje në zonën e Kozencës, në Itali, ku një grua ka rrëmbyer në maternitet një foshnje të porsalindur, duke iu prezantuar nënës së re, si infermiere.

Foshnja është rrëmbyer në maternitetin e klinikës “Sacro Cuore” në Cosenza të Italisë.

Pasi u rrëmbye nga çifti, Rosa Vespa 53-vjeç dhe Aqua Moses, 43 senegalez, vajza e vogël është gjetur tre orë më vonë.

Në pamjet e siguruara nga mediat italiane, duket një grua me maskë në fytyrë duke hyrë në dhomën e spitalit të nënës së re duke u shtirur si infermiere.

Ajo mori vajzën e vogël dhe tha se duhej të shihej nga pediatri.

Pas gjysmë ore, nëna dhe gjyshet, duke mos parë vogëlushen të kthehej në dhomë, kanë ngritur alarmin, i cili i është dërguar të gjitha forcave të policisë.

Sipas medias italiane, vajza e vogël kishte veshur një rrobë rozë me Minnie Mouse.

Pas tre orësh ankthi, vajza e vogël u gjet nga policia në një makinë së bashku me gruan dhe burrin që e morën nga klinika.

Të dy u ndaluan dhe u dërguan në komisariat.