Ish-Presidenti i Shqipërisë, Alfred Moisiu, ishte njëri nga folësit në protestën e mbajtur në Tiranë, që kërkon drejtësi për ish-krerët e UÇK-së.
Edhe pse në moshë të shtyer, Moisiu mbajti një fjalim të fuqishëm, duke theksuar se krerët e UÇK-së kanë kryer detyrën më të lartë që njeh historia.
“Jemi mbledhur për të mbrojtur dinjitetin tonë kombëtar, përballë padrejtësive që po u bëhet bijëve më të mirë të Kosovës. Çlirimtarëve që luftuan për lirinë e vendit të tyre. Në vitin 2022, isha në Hagë, për të takuar personalisht Presidentin Thaçi, Kadri Veselin, Jakup Krasniqi e Rexhep Selimi. Aty unë e pashë që këta burra nuk ishin të frikësuar. Ata ishin të qetë e të gatshëm për të sakrifikuar. Ata nuk kanë kryer krime, por kanë bërë detyrën më të lartë që njeh historia bashkohore, çlirimin e Kosovës dhe mbrojtjen e popullit të vet,” tha Moisiu.
