Irani kufizon kalimin e anijeve në Hormuz, s’do të lejojë më shumë se 15 anije në ditë

Irani nuk do të lejojë më shumë se 15 anije në ditë të kalojnë përmes Ngushticës së Hormuzit, sipas marrëveshjes së armëpushimit të dakorduar me SHBA-në, raporton The Guardian, duke cituar agjencinë ruse të lajmeve “Tass”.

Ngushtica e Hormuzit, 34 kilometra e gjerë mes Iranit dhe Omanit, ofron kalim nga Gjiri Persik në Oqeanin Indian dhe është rruga kryesore për një të pestën e furnizimeve botërore me naftë dhe mallra të tjera.

Ajo ishte mbyllur nga Irani që nga fillimi i luftës në fund të shkurtit, duke shkaktuar rritje të çmimeve të naftës në botë. Marrëveshja e armëpushimit mes SHBA-së dhe Iranit, e arritur të mërkurën, parashikon rihapjen e Ngushticës, por pas vazhdimit të bombardimeve të Libanit nga Izraeli, kalimi është pezulluar sërish.