Përgatiti: Sara Shehu
73-vjeçari, Nexhmi Stublla, këtë të enjte u regjistrua si banor i Prishtinës, në zyrën e Komunës, e cila u hap për qytetarët para pesë ditësh. Ai thotë se nuk ka pasur mundësi të regjistrohet, pasi ndodhej jashtë vendit.
“E kam prit me qejf regjistrimin e popullsisë, andaj kam ardhë sot me u regjistru, këtë proces duhet ta bëjnë të gjithë qytetarët, andaj unë erdha sot me realizu këtu në këtë zyrë, pasi kam qenë në Gjermani te djemtë e mi”, tha Stublla.
Zëdhënësi i Komunës, Donat Lushaku, tha se në këtë zyrë për pesë ditë janë regjistruar rreth 1000 qytetarë.
“Interesimi ka qenë i lartë vetëm për 5 ditë, 1000 qytetarë janë regjistruar, andaj sot dhe nesër presim që të regjistrohen edhe më shumë… numri i punëtorëve nuk është i mjaftueshëm, por ia kemi dalë”, tha Lushaku.
Tutje, Lushaku shtoi se kryetari i Prishtinës, Përparim Rama, ka kërkuar nga Agjencia e Statistikave të Kosovës që ta shtyjë afatin për regjistrim.
“Kryetari ka kërkuar nga ASK-ja që të rrisë afatin për regjistrim, pasi që ka ende nevojë që qytetarët që s’kanë pasë mundësi me kry këtë proces me realizu po ASK e ka anulu këtë kërkesë të kryetarit”, tha Lushaku.
Por, Agjencia e Statistikave e Kosovës thotë se ende nuk ka vendim për shtyrje ose jo të procesit.
“Vendimi për shtyrje ende nuk është marrë, se është e ngutshme deri më 17 maj besoj që kryhen regjistrimet. Do t’i shqyrtojmë të gjitha kërkesat dhe do ta shohim se çfarë të bëjmë”, tha Hazbije Qeriqi, zëdhënëse në ASK.
Në kuadër të regjistrimit të popullsisë, Agjencia e Statistikave e Kosovës deri të hënën ka marrë të dhënat e 1.4 milion banorëve brenda vendit dhe të 400 mijë të tjerëve nga diaspora.
