Çështja e personave të zhdukur gjatë luftës në Kosovë 1998–1999 vazhdon të mbetet një nga temat më të pazgjidhura pasluftës.
Të enjten, në Gjakovë, janë gjetur mbetje mortore të cilat dyshohet se i përkasin së paku një personi që figuron në listën e personave të zhdukur gjatë luftës.
Andin Hoti, kryesues i Komisionit Qeveritar për Personat e Zhdukur, ka bërë të ditur për Front Online se aktiviteti i zhvilluar ditën e djeshme ka qenë i planifikuar dhe lidhet kryesisht me rastet për konfirmim të identitetit.
“Ajo që ka ndodh dje, ka qenë zhvarrim i mbetjeve mortore të një personi, që më shumë ndërlidhet me rastet për konfirmim identiteti. Ka qenë aktivitet i planifikuar, që është realizuar dje. Presim përfundimin e ekzaminimeve dhe identifikimit përmes ADN-së, për hollësitë tjera që fillimisht do t’i bëhen të ditura familjeve”, tha ai.
Andin Hoti, kryesues i Komisionit Qeveritar për Personat e Zhdukur, tha për Front Online se gjatë këtij viti pritet të zhvillohen gërmime në tri lokacione të reja, përfshirë vazhdimin e gërmimeve në Rahovec.
Sipas tij, lokacionet janë identifikuar në bazë të analizave të dokumenteve të pranuara nga Tribunali i Hagës.
“Aktualisht edhe tri lokacione i kemi, për të cilat tanimë janë siguruar urdhëresat, përfshirë vazhdimin e gërmimeve në Rahovec. Lokacionet tjera dalin si rezultat i analizave që po bëhen në dokumentet që tashmë kemi pranuar nga Tribunali i Hagës”, tha Hoti.
Në fund, Hoti bëri të ditur se numri aktual i personave të zhdukur në Kosovë është 1 570, por kjo shifër pritet të ulet pas përfundimit të analizave të ADN-së për gjetjet e vitit 2025.
“1570 mbetet numri i personave të zhdukur, ky numër do te zvogëlohet edhe për shkak të gjetjeve të vitit 2025, por që nuk kemi pranuar ende raportet e ADN-së”, tha ai për Front Online.
Zbulohen mbetje mortore në Gjakovë, dyshohet se i përkasin personave të zhdukur gjatë luftës
