Ministrja e Drejtësisë, Albulena Haxhiu, është deklaruar pas rrëmbimit të tre policëve të Kosovës nga autoritetet serbe.
Sipas saj, “Serbia kriminale ka rrëmbyer tre pjesëtarë të policisë së Republikës së Kosovës në Leposaviç”.
Këto provokime, sipas Haxhiut, po organizohen nga shteti serb për ta destabilizuar situatën në veri të Kosovës.
E para e MD-së u shpreh se për këto ngjarje duhet të përgjigjet faktori ndërkombëtar.
Mes tjerash, Haxhiu në Twitter kërkoi që oficerët e PK-së të lirohen sa më shpejt dhe veprimet e tilla që ajo i cilëson agresive, të ndalen.
“Për provokime si këto, të organizuara nga Serbia me qëllim të destabilizimit të situatës në veri, duhet të përgjigjet edhe faktori ndërkombëtar. Oficerët e policisë duhet të lirohen sa më shpejt dhe veprimet e tilla agresive të ndalen”, ka shkruar Haxhiu.
