FIFA ka publikuar dënimet për federatat kombëtare pas përfundimit të ndeshjeve kualifikuese të zhvilluara në muajin qershor.
Federata Shqiptare e Futbollit është gjobitur me shumën më të lartë – 171 mijë euro (200 mijë dollarë amerikanë) – për shkelje të rregullave gjatë ndeshjes së zhvilluar më 7 qershor ndaj Serbisë në Tiranë.
Sipas FIFA-s, dënimi lidhet me pengimin e himnit kombëtar të kundërshtarit dhe transmetimin e një “mesazhi të papërshtatshëm për një ngjarje sportive”.
Kujtojmë se për këtë ndeshje, Federata Shqiptare dhe autoritetet shtetërore kishin ndërmarrë masa të rrepta sigurie për të shmangur çdo incident të mundshëm. Përfshirë këtu edhe vendimin për të mos shpërndarë bileta për grupin e tifozëve “Tifozat Kuq e Zi”, të cilët munguan plotësisht në stadium.
Megjithatë, pavarësisht këtyre masave parandaluese, Shqipëria është ndëshkuar me një nga gjobat më të larta nga institucioni më i lartë i futbollit botëror. /ATVLIVE.TV
