Edon Zhegrova kishte krijuar një dyshe sulmuese të frikshme me Jonathan Davidin te Lille. Të dy shkëlqyen në kampionatin francez dhe në Ligën e Kampionëve, duke lënë gjurmë me paraqitjet e tyre.
Tani, ata do të kenë sërish rastin të luajnë krah për krah, pasi janë transferuar këtë verë te Juventus ku “Zonja e Vjetër” pret shumë nga kjo dyshe premtuese.
Në një intervistë të gjatë për mediat italiane, Jonathan David nuk i kurseu fjalët e mira për shokun e tij, Zhegrovën, duke e vlerësuar lart si futbollist dhe si njeri.
“Kam ndarë disa sezone me të. Edoni është një lojtar i jashtëzakonshëm – me një të majtë fantastike dhe driblim të shkëlqyer. Ai është një përforcim i madh për Juventusin. Te Lille kishim gjithmonë një raport shumë të mirë, si në fushë ashtu edhe jashtë saj. Kjo lidhje mes nesh do të jetë një avantazh edhe te klubi i ri”, u shpreh sulmuesi kanadez.
David dhe Zhegrova pritet të debutojnë me fanellën bardhezi në sfidën e madhe kundër Interit, në derbin e Italisë që do të zhvillohet më 13 shtator, nga ora 18:00 në Turin.
