Ed Sheeran thyen heshtjen pas ndërprerjes së koncertit në rrugë nga policia

Ed Sheeran ka sqaruar situatën pas ndërprerjes së koncertit të tij në rrugë nga një polic.

Duke iu drejtuar ndjekësve të tij në Instagram, këngëtari shpërndau një mesazh duke i siguruar fansat se gjithçka është në rregull dhe se problemi është zgjidhur. “Kishim leje për të kënduar, prandaj dhe vendosëm të luanim në atë vend të saktë, kjo ishte e planifikuar më parë,” sqaroi ai, duke theksuar se koncerti i tij nuk ishte një ngjarje spontane, dhe megjithëse kishin marrë leje për koncertin, ai u ndërpre papritur nga policia. “Nuk ishim vetëm ne që shkuam aty rastësisht.”

Ed Sheeran, emri i plotë i të cilit është Edward Christopher Sheeran, dha këtë përditësim pas një videoje të kapur nga një fans që bëri xhiron e mediave sociale gjatë fundjavës. Videoja tregon momentin kur një polic ndërpret koncertin e befasishëm të këngëtarit, ndërsa Ed Sheeran, 33 vjeç, ishte duke kënduar për një audiencë.

Ed Sheeran është aktualisht në Indi për turneun e tij ndërkombëtar “Mathematics”. Ai ka dhënë dy koncerte në terrenin NICE në qytetin e Bengaluru në jug të Indisë, më 8 dhe 9 shkurt./NO FILT/