Elita e futbollit të Kosovës është në ankth të kryendeshjes së mbetur të javës së 13-të, ku përballë njëra-tjetrës do të dalin dy nga skuadrat më të mëdha të vendit – kampioni në fuqi Drita dhe fituesi i Kupës së Kosovës, Prishtina.
Përballja do të zhvillohet nesër (e mërkurë) me fillim nga ora 13:00, në stadiumin ndihmës në Gjilan, dhe pritet të ofrojë spektakël, emocione dhe shumë rëndësi në garën për kreun e tabelës.
Drita hyn në këtë duel me synimin e qartë për të marrë tri pikë, të cilat do ta afronin ndjeshëm me vendet e para, ndërsa Prishtina kërkon fitore për t’u barazuar me liderin aktual të kampionatit, Ballkanin e Therandës.
Aktualisht, tabela e renditjes kryesohet nga Ballkani me 33 pikë, pasuar nga Prishtina me 30, Dukagjini me 29, Malisheva me 27, ndërsa Drita dhe Gjilani ndajnë nga 26 pikë secila.
Nga klubi kryeqytetas kanë konfirmuar zyrtarisht zhvillimin e kësaj ndeshjeje, duke theksuar se ajo do të shënojë edhe përfundimin e sezonit vjeshtor.
“Ndeshjen e mbetur të javës së 13-të ndaj FC Dritës do ta zhvillojmë të mërkurën, më 24 dhjetor, me fillim nga ora 13:00, në stadiumin ndihmës në Gjilan. Me këtë ndeshje mbyllim sezonin vjeshtor”, thuhet në njoftimin e FC Prishtinës.
Dueli në Gjilan pritet të jetë vendimtar për renditjen në krye dhe një mbyllje dinjitoze e pjesës së parë të sezonit në Superligën e Kosovës.
