Ministër i Kulturës, Rinisë dhe Sportit, Hajrulla Çeku, ka bërë të ditur se është shpallur konkursi për hartimin e Master Planit për Kompleksin Memorial Adem Jashari në Prekaz.
Çeku përmes një postimi në Facebook, është shprehur se nuk do të kursehet asgjë për të pasur një kompleks memorial, siç u shpreh ai, të përmasave botërore.
“Pas angazhimit të Komisionit të ekspertëve për hartim të detyrës projektuese, dhe pas miratimit të kushteve, kritereve dhe procedurave nga Qeveria e Kosovës, kemi shpallur konkursin për hartimin e Master Planit”, ka thënë.
Tutje, ministri ka bërë të ditur se konkursi është hapur dje dhe afati i fundit për dorëzim është deri më 07.07.2023.
“Ky është ndër proceset dhe projektet më delikate të Republikës sonë, kemi punuar me hapa të sigurt, pa u ngutur, por edhe pa humbur kohë. Nuk do të kursejmë asgjë për të pasur një kompleks memorial të përmasave botërore, çfarë është edhe figura e Adem Jasharit. Një kompleks memorial që do të rrëfejë dinjitetshëm dhe me standard të arrirë artistik rezistencën e popullit dhe luftën për liri, pavarësi e bashkim”, shkroi tutje Çeku.
