Çeku dhe Rama “përplasen” për lokacionin e palestrës multisportive në Prishtinë

Përgatiti: Pranvera Krasniqi

Formën e komunikimit e zgjodhën nëpërmjet rrjeteve sociale.

Ministri i kulturës, Hajrulla Çeku, dhe kryetari i Prishtinës, Përparim Rama, fajësuan njëri-tjetrin për mosrealizimin e palestrës Multisportive.

Reagimeve të njëpasnjëshme, fillimisht I priu ministri Çeku, I cili akuzoi Komunën e Prishtinës se ka një vit që ka neglizhuar ndarjen e lokacionit për projektin e Palestrës Multisportive, për ndërtimin e së cilës thotë se është ndarë një buxhet prej 3.5 milionë euro.

Ndërsa, kryetari Rama i është kundërpërgjigjur ministrit Çeku duke thënë se kanë qenë asamblistët e LV-së që katër herë e kanë refuzuar lokacionin dhe planin për Palestër.

Dy ditë më vonë, reagimet e Ramës, Çeku i quajti gënjeshtra.

Atë çka tha ministri Ceku, po e thotë edhe Asamblisti i Vetëvendosjes në Komunën e Prishtinës, Besart Krasniqi.

Sipas tij, gjatë vitit 2024, në asnjërën seancë komunale, nuk është prezantuar lokacioni se ku pritet të ndërtohet palestra. Por, Krasniqi zotohet se do të votojnë PRO, kurdo që kjo çështje të jetë në rend dite.

Lidhur me këtë, askush nga pushteti komunal e as nga përfaqësuesit e asamblesë komunale nga lidhja demokratike, nuk pranuan të deklarohen gjatë të martës.

Sidoqoftë, nga kjo situatë po konsiderohet se pasojat do t’i bartin qytetarët.

Lokacioni për realizimin e Palestrës Multisportive, për të cilin është dakorduar edhe Federata e Basketbollit gjendet në Hajvali, pranë Qendrës Nacionale të Futbollit.

Mirëpo, nuk dihet se kur do të dërgohet kjo pikë në kuvendin komunal për miratim.