Aksident trafiku në Zveçan, vdes një person

Policia e Kosovës njoftoi se një shtetas i Serbisë, ka vdekur si pasojë e një aksident trafiku që ka ndodhur mbrëmë në fshatin Rudare të Zveçanit.

“Fsh. Rudare, Zveçan 20.04.2023-19:35. I dyshuari mashkull shtetas (serb) i Serbisë, derisa ishte duke drejtuar veturën, dyshohet nga pakujdesia ka shkaktuar aksidentin duke goditur veturën tjetër të cilën ishte duke e drejtuar viktima mashkull boshnjak-shtetas i Serbisë. Si pasojë e aksidentit, i dyshuari ka pësuar lëndime vdekjeprurëse, ndërsa viktima ka pësuar lëndime”, thuhet në raportin 24-orësh të Policisë.

Tutje, Policia njoftoi se vdekjen e të dyshuarit e ka konstatuar mjeku kujdestar në spitalin në Mitrovicë-Veri, ndërsa, viktima është dërguar për tretman mjekësor në të njëjtin spital.

Ndërkohë, lidhur me këtë rast Prokurori ka vendosur që trupi i pajetë të dërgohet në Institutin e Mjekësisë Ligjore, për obduksion, por ka qenë refuzimi i familjarëve për ta dërguar në IML dhe i njëjti u është dorëzuar familjarëve./atvlive.tv/