Aktorja legjendare italiane, Claudia Cardinale, e njohur për rolet e saj në filmat klasikë si The Pink Panther dhe Once Upon a Time in the West, ka ndërruar jetë në moshën 87-vjeçare, njoftojnë mediat franceze.
Sipas agjentit të saj për agjencinë AFP, Cardinale vdiq në qytetin Nemours të Francës, e rrethuar nga fëmijët e saj. Gjatë karrierës së saj të gjatë, ajo ka luajtur në më shumë se 100 filma dhe prodhime televizive, duke lënë gjurmë të pashlyeshme në historinë e kinemasë.
Cardinale, e lindur në Tunizi nga prindër sicilianë, filloi rrugëtimin e saj drejt famës kur në moshën 17-vjeçare fitoi një konkurs bukurie që i dha mundësinë të merrte pjesë në Festivalin e Filmit në Venecia. Ajo fillimisht kishte planifikuar të bëhej mësuese, por kjo eksperiencë i dha një shtysë të madhe karrierës në aktrim.
Ajo arriti famë ndërkombëtare në vitin 1963 me rolet në filmat 8½ dhe Leopardi të Federico Fellinit, duke vazhduar më pas me hitet e saj të tjera, përfshirë edhe komedinë The Pink Panther dhe westernin epik Once Upon a Time in the West të Sergio Leone në 1968.
Përveç arritjeve në kinematografi, Cardinale ishte edhe aktiviste e shquar për të drejtat e grave, duke u emëruar në vitin 2000 ambasadore e vullnetit të mirë për Organizatën Arsimore, Shkencore dhe Kulturore të OKB-së (UNESCO).
Aktorja la pas dy fëmijë dhe një trashëgimi të pasur artistike që do të kujtohet përgjithmonë nga fansat dhe industria e filmit.
