Presidenti i SHBA-së Donald Trump deklaroi sot në Forumin Ekonomik Botëror në Davos se dëshiron të takohet së shpejti me homologun e tij rus Vladimir Putin për të siguruar fundin e luftës gati trevjeçare në Ukrainë.
Në prag të fitores së tij në zgjedhjet e 5 nëntorit, Trump deklaroi dhjetëra herë se do të arrinte një marrëveshje midis Ukrainës dhe Rusisë në ditën e tij të parë në detyrë, nëse jo më parë. Këshilltarët e tij tani pranojnë se do të duhen muaj për të zgjidhur luftën.
“Unë me të vërtetë do të doja të takohesha me presidentin Putin së shpejti për t’i dhënë fund asaj lufte. Miliona jetë po humbasin, kjo është një masakër,” tha Trump përmes një lidhjeje video në Davos.
Trump tha gjithashtu se përpjekjet e SHBA për të siguruar një zgjidhje paqeje ishin duke u zhvilluar, por ai nuk dha detaje.
Presidenti amerikan kërcënoi dje Rusinë me sanksione të reja nëse nuk bën një marrëveshje me Ukrainën.
“Nëse nuk arrijmë një marrëveshje, shpejt, nuk do të kem zgjidhje tjetër veçse të rris taksat, tarifat dhe sanksionet për gjithçka që Rusia mund t’i shesë Shteteve të Bashkuara, si dhe vendeve të tjera që bashkohen”, tha Trump.
Moska u përgjigj se ishte e gatshme për dialog, por me respekt të ndërsjellë.
