Dita e parë e muajit Maj njihet ndryshe edhe si Dita Ndërkombëtare e Punëtorëve.
Çdo vit, në këtë ditë, në mbarë globin njerëzit marshojnë nëpër rrugë për të përkujtuar 1 Majin dhe për të kërkuar kushte më të mira të punës.
Kjo ditë iu referohet protestave të punëtorëve, për orar të punës 8 orë, për paga mesatare të garantuara, për pajisje mbrojtëse në vendin e punës dhe kërkesa e pare publike është paraqitur në Australi gjatë vitit 1885 nën moton 8 orë punë, 8 orë dëfrim e 8 orë gjumë”. Një moto që i hapi rrugën kërkesave të tjera të përgjithshme dhe caktimit të një dite, pikërisht në 1 maj, ku të gjithë punëtorët mund të takoheshin për të mbrojtur autonominë e tyre.
Zgjedhja e kësaj date u bë si pasojë e incidenteve të rënda të ndodhura në ditët e para të majit të vitit 1886 në Chicago, që njihen si revolta e “Haymarket”. Në mes të ‘800-ës, punëtorët nuk kishin të drejta, punonin dhe 16 orë në ditë, në kushte shumë të këqija dhe shpesh humbnin jetën në vendet e punës.
Në 1 maj të 1886-ës u mbajt një grevë e përgjithshme në të gjithë Shtetet e Bashkuara të Amerikës për të reduktuar ditën e punës në 8 orë. Protesta zgjti tri ditë dhe kulmoi në 4 maj, me një masakër të vërtetë ku mbetën të vrarë 11 persona.
1 maji në Evropë, historikisht ka qenë gjithmonë i lidhur me festivalet tradicionale rurale të fermerëve, por më vonë u lidh me lëvizjen moderne të punës. Vendimi që 1 maji të shënohet çdo vit dhe në të gjitha vendet të njihet si “Dita e Punëtorëve” u mor në vitin 1891 në Bruksel.
Çdo vit në po të njejtën ditë njerëzit në mbarë botën përkujtojnë Ditën e Punës, të njohur edhe si Dita Ndërkombëtare e Punëtorëve, me protesta në shkallë të gjerë të realizuar nga sindikatat.
Në shumë vende, 1 Maji është një festë zyrtare publike dhe punëtorët e kanë ditë pushimi. /atvlive.tv
