Dantella e Koniakow-it, një mjeshtëri e trashëguar brez pas brezi në Poloni, është sot një nga elementët më të veçantë që kanë hyrë në botën e modës së lartë. Ky art tradicional i qëndisjes me grep, i praktikuar në fshatin Koniakow në jugperëndim të vendit, është përfshirë edhe në Listën Kombëtare të Trashëgimisë Jomateriale të UNESCO-s.
Pothuajse çdo grua në këtë fshat di të qëndisë dantellë – aftësi që mësohet që në fëmijëri. Njëra prej mjeshtreve, Wieslawa Juroszek, kujton se punoi copën e saj të parë vetëm 6 vjeçe, ndërsa sot rreth 700 gra janë të angazhuara në këtë traditë.
Ajo që e bën unike dantellën e Koniakow-it është fakti se nuk përdoren shabllone: çdo dizajn lind nga imagjinata dhe përvoja e artizaneve. Nga tavolinat dhe altarët ku përdorej dikur, sot kjo dantellë zbukuron pasarelat më prestigjioze.
Marka të mëdha si Dior, Dolce & Gabbana dhe stilistja polake Magda Butrym e kanë përfshirë në koleksionet e tyre, ndërsa në vitin 2018, në Javën e Modës në Paris, Rei Kawakubo e përdori në një xhaketë nusërie. Kjo traditë ka arritur deri në kopertinën e Vogue, duke e shndërruar në një fenomen ndërkombëtar.
Një moment i veçantë për këtë zanat është festivali veror “Ditët e Dantellës së Koniakow-it”, ku mbahen punëtori, demonstrime dhe takime me mjeshtret e zonës.
Sot, brezat e rinj po i japin një frymë moderne kësaj trashëgimie duke dokumentuar teknikat online dhe duke e kthyer dantellën e Koniakow-it në një markë botërore të modës luksoze.
