Shtatë raste të dhunës në familje brenda 24 orëve të fundit

Shtatë raste të dhunës në familje janë raportuar në Policinë e Kosovës gjatë 24 orëve të fundit, në Prishtinë, Lipjan, Viti, Kaçanik dhe Gjakovë.
Sipas raportit 24-orësh të Policisë, rastet janë raportuar më 16 nëntor, ndërsa në to janë përfshirë si viktima burra ashtu edhe gra.
Reklamë
Në Prishtinë janë raportuar tri raste të ndara. Në dy prej tyre, të dyshuarit meshkuj dyshohet se kanë ushtruar dhunë psiqike dhe fizike ndaj viktimave femra, ndërsa në rastin e tretë një grua dyshohet se ka sulmuar fizikisht një burrë pas një mosmarrëveshjeje.
Një rast është raportuar edhe në Lipjan, ku dy persona, një burrë dhe një grua, dyshohet se kanë ushtruar dhunë fizike dhe psiqike ndaj një gruaje. Viktima ka pranuar tretman mjekësor.
Në Viti, një burrë ka kërkuar ndihmë mjekësore pasi dyshohet se është lënduar nga një person tjetër. I dyshuari është arrestuar dhe, pas intervistimit, me vendim të prokurorit është dërguar në mbajtje.
Edhe në Kaçanik është arrestuar një burrë, i dyshuar për ushtrim të dhunës fizike ndaj një gruaje. Viktima ka pranuar tretman mjekësor, ndërsa i dyshuari është dërguar në mbajtje.
Ndërkaq, në Gjakovë është arrestuar një person nën dyshimin se ka ushtruar dhunë psikike dhe fizike ndaj një gruaje. Viktima ka refuzuar tretmanin mjekësor.
Policia ka bërë të ditur se në rastet e tjera, me vendim të prokurorit, palët janë liruar dhe procedurat do të vazhdojnë në procedurë të rregullt.
Raporti:
Prishtinë / 16.11.2026 – 15:20. Është shoqëruar në stacion policor i dyshuari mashkull kosovar për shkak të dyshimit se kishte ushtruar dhunë psiqike ndaj viktimës femër kosovare. Me vendim të prokurorit, i dyshuari është liruar në procedurë të rregullt.
Prishtinë / 16.11.2026 – 15:30. Është shoqëruar në stacion policor i dyshuari mashkull kosovar, pasi që dyshohet se ka ushtruar dhunë psikike dhe fizike ndaj viktimës femër kosovare. Me vendim të prokurorit pas intervistimit palët janë liruar dhe rasti shkon në procedurë të rregullt.
Prishtinë 16.11.2026, 21:30.Është raportuar se pas një mosmarrëveshje e dyshuara femër kosovare dyshohet se ka sulmuar fizikisht viktimën mashkull kosovar. Pas intervistimit të palëve me vendim të prokurorit rasti procedohet në procedurë të rregullt.
Lipjan 16.11.2026, 21:30.Janë shoqëruar në stacion policor dy të dyshuarit një mashkull dhe një femër kosovare, pasi që të njëjtit dyshohet se kishin ushtruar dhunë psikike dhe fizike ndaj viktimës femër kosovare. Lidhur me rastin viktima ka pranuar tretman mjekësor. Me vendim të prokurorit pas intervistimit rasti procedohet në procedurë të rregullt.
Viti / 16.11.2026 – 11:00.Viktima mashkull kosovar kishte kërkuar tretman mjekësore në QKMF pasi dyshohet se i njëjti kishte pësuar lëndime nga i dyshuari mashkull kosovar. I dyshuari është arrestuar, nga i njëjti është konfiskuar mjeti i cili dyshohet se ishte përdorur në rast, dhe pas intervistimit me vendim të prokurorit është dërguar në mbajtje, kurse viktima është dërguar për trajtim të mëtutjeshëm mjekësor.
Kaqanik / 16.11.2026 – 14:00.Është arrestuar i dyshuari mashkull kosovar për shkak se dyshohet se kishte ushtruar dhunë fizike ndaj viktimës femër kosovare. Viktima ka pranuar tretman mjekësor. I dyshuari pas intervistimit me vendim të prokurorit është dërguar në mbajtje.
Gjakovë / 16.11.2026 – 15:35. Është arrestuar i dyshuari mashkull kosovar, pasi që i njëjti dyshohet se kishte ushtruar dhunë psikike dhe fizike ndaj viktimës femër kosovare. Viktima ka refuzuar tretman mjekësor. Me vendim të prokurorit palët janë liruar dhe rasti shkon në procedurë të rregullt.
Reklamë







