Edhe pse kjo paraqitet si një iniciativë spontane qytetare, gjithnjë e më shumë lindin dyshime se bëhet fjalë për një aksion të organizuar nga strukturat politike, ku serbët e Kosovës shfrytëzohen si simbol lojaliteti dhe patriotizmi në funksion të propagandës së Aleksandar Vuçiqit.
Sipas pamjeve të transmetuara nga mediat pro-qeveritare qe janë në shërbim te Vuciqit shihen të rinj nga vende të ndryshme të Kosovës duke kënduar këngë patriotike dhe duke valëvitur pankarta me mbishkrime si “Graçanica, Kosova dhe Metohia” dhe “Kosova është zemra e Serbisë”. Ata kanë nisur marshimin nga Rudnica, afër pikës kufitare në Jarinjë.
Ky marshim ka për qëllim mbështetjen e mitingut të 12 prillit në Beograd, ku Vuçiq do të prezantojë projektin e tij të ri politik – “Lëvizja për popullin dhe shtetin”, tashmë e përkrahur edhe nga Lista Serbe, strukturë kjo e lidhur ngushtë me partinë e Vuçiqit SNS.
Megjithatë, realiteti në Serbi flet për një situatë të ndryshme. Protestat masive të qytetarëve dhe studentëve kundër pushtetit te Vuçiqit, refuzimi në rritje ndaj propagandës shtetërore dhe raportimet për presione ndaj punonjësve të institucioneve për të marrë pjesë në mitingje, hedhin hije dyshimi mbi “vullnetin e lirë” të pjesëmarrësve të serbeve nga Kosova.
Rastet e ngjashme janë shënuar edhe në vitet 2019 dhe 2023, kur grupe të organizuara të serbëve nga Kosova udhëtuan në Beograd për mitingje politike, shpesh të shoqëruara nga përfaqësues të Listës Serbe dhe nën mbikëqyrjen e strukturave partiake.
Ndërsa Vuçiq dhe mediat e tij e paraqesin këtë si mbështetje të sinqertë popullore, shumë analistë dhe qytetarë paralajmërojnë se serbët e Kosovës po përdoren sërish – jo si qytetarë me vullnet dhe subjektivitet politik, por si instrument simbolik për nevojat propagandistike të pushtetit në Beograd.
