Rrokullisja e kamionit në autostradë, policia kufizon qarkullimin në një shirit

Kamioni i cili është rrokullisur në autostradën “Ibrahim Rugova”, në drejtimin Malishevë-Prishtinë ka qenë duke transportuar zhavorr.

Kështu ka bërë të ditur zëdhënësja e policisë, Luljeta Mehmeti e cila tha se nga ky aksident nuk ka të lënduar.

Ajo gjithashtu ka bërë të ditur se për momentin qarkullimi në këtë segment të autostradës është i kufizuar vetëm në një shirit rrugor.

“Në aksident është përfshirë një automjet transportues i ngarkuar me zhavorr. Si pasojë e aksidentit ngarkesa është shpërndarë në rrugë. Sipas njoftimit nga njësitë në terren për momentin qarkullimi në këtë segment të autostradës është i kufizuar vetëm me një shirit rrugor ndërsa njësitet policore dhe ekipet kompetente ndodhen në vendin e ngjarjes dhe po ndërmarrin veprimet e nevojshme për lirimin e plotë të qarkullimit”, thuhet në konfirmim.