Policia e Kosovës nuk e ka përmendur asnjë të dyshuar për rastin e vrasjes së rreshterit Muhamed Lika.
Në raportin 24-orësh, të përditshëm policor, janë shpalosur pak informata për rastin i cili tronditi vendin të martën në mbrëmje.
“Pasi është raportuar për një një person të plagosur, njësitë policore i janë përgjigjur vendit të ngjarjes dhe nga ekipi mjekësor është konstatuar se viktima mashkull kosovar (zyrtar policor) është pa shenja jete”, thuhet në raport.
Policia tha se prokurori i rastit ka urdhëruar që trupi i pajetë i rreshterit Lika të dërgohet në Instituin e Mjekësisë Ligjore.
“Lidhur me rastin janë ndërmarrë veprimet përkatëse nga të gjitha njësitë relevante policore si dhe prokurori me urdhër të të cilit trupi i pajetë është dërguar në IML për obduksion”, tha policia në raport.
Muhamed Lika, zyrtar i Policisë së Kosovës, u vra të martën rreth orës 23:00 në hyrje të banesës së tij në Kaçanik.
