Tek këtë muaj, Ministria e Ekonomisë do të mbyllë diskutimin publik për Programin e Zbatimit të Strategjisë së Energjisë 2022-2025.
Draft-dokumenti i nxjerrë me së paku një vit e gjysmë vonesë, saktëson disa prej investimeve që parashihet të kryhen dhe koston financiare të tyre.
Më shumë se 415 milionë euro është vlera e investimeve kapitale që drafti parasheh nga ky vit deri më 2025, në dy termocentralet ekzistuese me thëngjill.
Pos buxhetit të KEK-ut, si burim financimi, në dokumentin e saj Qeveria llogarit edhe në ndihmë financiare prej dhjetëra miliona eurosh nga BE-ja.
Nga investimi i planifikuar në filtrat e bllokut B1, më 2024, në vlerë 88 milionë euro, ME-ja llogarit se 37.5 milionë euro do t’i mbulojë BE-ja.
Njësoj edhe për B2shin, më 2025.
Me buxhet tërësisht vendor parashihen investime në Termocentralin Kosova A, i cili, sipas Strategjisë, nga viti 2028 do të përdoret vetëm si rezervë.
Për investimet e planifikuara për këtë vit, ende nuk ka ndonjë njoftim publik.
Në draft-dokumentin e nxjerrë në konsultime me 20 Qershor, si burime financimi për projekte të ndryshme në sektorin e energjisë, përmenden edhe Fondet nga IPA apo Fondi Investiv për Ballkanin Perëndimor – të cilat aktualisht janë të pezulluara në kuadër të masave ndëshkuese nga BE-ja. /atvlive.tv
Edicionin Qendror të lajmeve në ATV e gjeni në videon më poshtë:
