Osmani: Prania e NATO-s në Kosovë, barrierë kundër përpjekjeve për cenim të paqes dhe stabilitetit

“Prania e trupave të NATO-s në Kosovë nuk është vetëm një garanci për sigurinë tonë por është edhe një barrierë kundër çdo lloj përpjekje për cenimin e paqes dhe stabilitetit për të cilin të gjithë së bashku kemi punuar e sakrifikuar shumë gjatë”, tha presidentja e vendit, Vjosa Osmani të martën në konferencë për media me shefin e NATO-s, Mark Rutte.

Pas takimit me sekretarin e përgjithshëm të NATO-s, Osmani tha se Beogradi po tenton të destabilizojë Kosovën dhe gjithë rajonin.

Ajo shtoi se është me rëndësi që të shtohet prania dhe pajisjet për mbrojtjen e kufirit.

“Para më shumë se 25 vitesh, shumica prej nesh që na takuat sot kemi qenë të rinj ose fëmijë të cilët dolëm t’i presim ushtarët e NATO-s. Përgjatë këtyre 25 viteve së bashku me juve e kemi shndërruar Kosovën në një vend me demokraci. NATO është themeluar mbi vlerat, prandaj edhe synimi për anëtarësim është një domosdoshmëri. Është me rëndësi që ky rajon të mos ketë vakume të sigurisë”, tha ajo.