Osmani falënderon USAID-in: Pas luftës, kur ëndrrat u shkatërruan, një dorë na u zgjat – ajo e popullit amerikan

Presidentja e vendit, Vjosa Osmani ka falënderuar USAID-in i cili qëndroi pranë Kosovës tash e 25 vjet.

Me anë të një mesazhi, e para e shtetit thotë se pas luftës gjenocidale të Millosheviqit, kur plagët ishin të freskëta dhe ëndrrat u shkatërruan, një dorë na u zgjat. Ishte dora e miqësisë, dora e partneritetit – dora e popullit amerikan.

“Faleminderit për 25 vjet mbështetje të pakursyer! Na presin edhe shumë vite të tjera bashkëpunimi akoma më të suksesshme përpara”, ka shkruar Osmani në Facebook ku ka ndarë edhe mesazhin e saj me anë të një videoje.

“25 vjet më parë, pas luftës gjenocidale të Millosheviqit, kur plagët ishin të freskëta dhe ëndrrat u shkatërruan, një dorë na u zgjat. Ishte dora e miqësisë, dora e partneritetit – dora e popullit amerikan. Sot, ne shohim trashëgiminë e partneritetit tonë me USAID-in, në çdo cep të vendit tonë”, ka shkruar më tej Osmani në një postim tjetër në “X”.