Diplomatë dhe shtetas nga Britania, SHBA-ja, Franca dhe Kina do të evakuohen nga Sudani nëpërmjet aeroplanëve ushtarakë, teksa luftimet në këtë vend janë duke vazhduar.
Shefi i ushtrisë, Fattah al-Burhan, tha se është pajtuar që ta ndihmojë dhe ta sigurojë evakuimin e tyre gjatë orëve në vijim, nga kryeqyteti, Khartum.
Arabia Saudite gjithashtu tha se po planifikon evakuimin e shtetasve të saj dhe të shtetasve të vendeve “vëllazërore”.
Planet e mëhershme për të evakuuar shtetasit e huaj nuk u zbatuan, për shkaqe të sigurisë.
Dhuna në Sudan shpërtheu më 15 prill kur nisën luftimet mes forcave besnike të shefit të ushtrisë, Abdel Fattah al-Burhan, dhe zëvendësit të tij, Mohamed Hamdan Daglo, i cili komandon grupin paramilitar të Forcave të Mbështetjes së Shpejtë.
Në javën e parë që kur filluan luftimet në mbarë vendin, raportohet se janë vrarë qindra njerëz.
Luftimet tani kanë hyrë në javën e dytë, teksa është shkelur edhe një armëpushim i përkohshëm treditor, që ishte vendosur për festën e Bajramit.
Gjatë natës janë dëgjuar shpërthime të fuqishme në kryeqytetin sudanez, Kartum, ndërsa në mëngjesin e së shtunës janë rikthyer luftimet me armë zjarri. /atvlive.tv
