Filmi “Ninullë” i regjisorit të ri shqiptar nga Zvicra, Adrian Asllani, ka rrëmbyer tri çmime në festivalin e filmit në Zvicër, “Zuger Filmtage”.
Regjisori i filmit, në një lidhje të drejtpërdrejt në emisionin ALARM në ATV, tregoi se filmi “Ninullë” është edhe projekti i tij serioz të cilin e ka bërë me vet financim.
Ai tha se për të ka qenë shumë me rëndësi edhe pjesëmarrja në festivalet “PriFest” dhe “Atlanta Film Festival”, ndërsa nuk ka pritur që të ketë kaq shumë jehonë edhe në festivalin “Zuger Filmtage”.
“Unë jam gëzuar shumë kur i kam marrë çmimet, se për mua ky projekt ka qenë një projekt shumë i veçantë sepse ka qenë projekti i parë në Kosovë që e kam realizu. Është filmi i parë me të cilin kam marrë çmime, dhe thuajse është filmi i parë i imi seioz, sepse përpara kam bërë më shumë filma të shkurtër, por me mjete më të thjeshta, me mundësitë që i kemi pasë, thuajse pa para e pa buxhet. Ky ka qenë projekti i parë që me seriozitet kam punuar dhe jam përkushtuar shumë dhe për mua pjesëmarrja nëpër festivale, edhe në “PriFest” që isha në Kosovë, edhe në “Atlanta Film Festival” në SHBA, tash edhe në “Zuger Filmtage”, nuk e kam pritur që ka me pasë ky film këtë jehonë”, tha Asllani.
Ai thotë se filmi është bërë me një buxhet modest, si vet financim, por për të ka qenë më me rëndësi që të paguhen njerëzit të cilët kanë kontribuuar në këtë film.
“E kam vet financuar filmin, me do para. Në fakt nuk e kam pasë buxhetin shumë të lartë, por me ato mjete që kam pasë mundësi… për mua ka qenë me rëndësi që t’i paguaj njerëzit. Për mua, filmi, arti është shumë shtrenjtë për me e krijua, për shkak të teknikës. Shpeshherë, për shkak të teknikës për shkak të pasionit të madh, mundohet njeriu me i ulë çmimet edhe me e ba një kompromis, sidomos kur është i vetë financuem, por për mua ka qenë me rëndësi që t’i paguaj njerëzit dhe me ato mjete që i kam me i pagu mirë edhe me i trajtu mirë”, u shpreh regjisori Asllani. /atvlive.tv
Bisedën e tij të plotë në ALARM e gjeni në videon më poshtë:
