Për shkak të numrit të ulët të çerdheve publike, nga shtatori pritet të fillojë subvencionimi në vlerë prej 70 eurosh për regjistrim të fëmijëve në institucionet parashkollore private.
Komuna e Prishtinës ka ndarë buxhet prej 100 mijë eurosh, por paraprakisht duhet plotësuar disa kritere.
“Varet se sa do të jetë numri i aplikimeve, por buxheti mbulon rreth 120 familje. Jemi ende duke i hartuar kriteret, por një nga kriteret kryesore është se të hyrat duhet të jenë nën 500 euro”, tha drejtoresha e Arsimit në Komunën e Prishtinës, Besianë Musmurati.
Ndjekja e arsimit parashkollor vlerësohet të jetë e ulët, andaj ky vendim po konsiderohet i rëndësishëm për rritjen e numrit të fëmijëve që shkojnë në çerdhe.
Madje, vendimin e përshëndesin edhe prindërit.
“Konsideroj që të gjithë fëmijët duhet të kenë mundësinë për të shkuar në çerdhe. Vendim mjaft i duhur, pasi edhe kushtet ekonomike tashmë nuk janë edhe shumë të mira. Shumë mirë që t’i ndihmojnë prindërit në këtë aspekt”, tha Arjeta Shabani, prind.
Sipas Agjencisë së Statistikave, në vitin 2022/2023 numri i fëmijëve të përfshirë në arsimin parashkollor, grupmoshat nga 0 deri në 4 vjeç, është 5.420 në ato publike, ndërkaq në private është 4.280. /atvlive.tv
Edicionin Qendror të lajmeve në ATV e gjeni në videon më poshtë:
