Qeveria e Kosovës dhe Qeveria e Shqipërisë kanë nënshkruar të enjten 13 marrëveshje, memorandume bashkëpunimi e deklaratë, ka njoftuar Zyra e Kryeministrit në mbrëmje.
Në mëngjes, kryeministri i Shqipërisë, Edi Rama, njoftoi se i janë dorëzuar Qeverisë së Kosovës nënshkrimet e ministrave të Shqipërisë, për t’i finalizuar marrëveshjet, që kishin ngelur pezull nga muaji i shkuar, kur Rama anuloi mbledhjen e dy qeverive. Në mbrëmje, Qeveria e Kosovës ka njoftuar se janë nënshkruar të 13 marrëveshjet.
Për dy vjet, në dy mbledhjet e shkuara janë nënshkruar 41 marrëveshje qeveritare, ndërministrore e ndërinstitucionale.
Për dy vjet, në dy mbledhjet e shkuara janë nënshkruar 41 marrëveshje qeveritare, ndërministrore e ndërinstitucionale.
Në këto marrëveshje përfshihet ajo e njohjes reciproke të profesionit të avokatit dhe ndërmjetësit; ajo për bashkëpunimin në bujqësi për lehtësimin e procedurave të kontrollit të produkteve të origjinës joshtazore; për fushën e inspektimeve dhe dhurimi i Shqipërisë për Kosovën i portalit e-inspection.
Është nënshkruar edhe deklarata e përbashkët e ministrive të Brendshme për “intensifikimin e bashkëpunimit në fushën e sigurisë, kryesisht duke u fokusuar në lehtësimin e qarkullimit ndërkufitar dhe avancimin e shkëmbimit të informacioneve përmes sistemeve të Menaxhimit të Kufirit, avancimin e Qendrës së Përbashkët për Menaxhimin e Integruar të Kufirit, si dhe avancimin e bashkëpunimit në parandalimin dhe luftimin e krimit”.
“Marrëveshjet, së bashku me ato të nënshkruara në dy mbledhjet e mbajtura në dy vitet e fundit mes qeverive, i sjellin vendet e qytetarët tanë më pranë njëri-tjetrit dhe ritheksojnë fuqizimin e bashkëpunimit të Republikës së Kosovës me Republikën e Shqipërisë. Qeveria e Republikës së Kosovës mirëpret mbledhjet e ardhshme të përbashkëta, të cilat duhet të mbahen mes vendeve tona, për diskutime të frytshme e dhënie hov të punëve të mira dhe bashkëpunimit”, thuhet në njoftim.
Nënshkrimi disa javë pasi Rama anuloi organizimin e mbledhjeve në Gjakovë. Si arsyetim pati përdorur tensionet në veri dhe “mosdëgjimin e Kosovës” përballë kërkesave të ndërkombëtarëve. Ai pati kërkuar takim sy më sy me kryeministrin e Kosovës, Albin Kurti, por homologu nga Kosova refuzoi duke thënë se s’mund të ketë takim pa mbledhjen e qeverive. Si pasojë, të enjten Rama vizitoi Kosovën dhe u takua me presidenten dhe kryeparlamentarin, por jo edhe kryeministrin e Kosovës.
