Përgatiti: Armand Hoti
Misioneve diplomatike të Kosovës, mund t’u shtohet një mekanizëm i ri inspektues.
Ministria e Punëve të Jashtme, synon ta funksionalizojë postin e inspektorit diplomatik.
“Misionet diplomatike dhe postet konsullore kanë për obligim t’i përgjigjen inspektorit diplomatik gjatë gjithë procesit të inspektimit, duke i ofruar qasje të papenguar në të gjitha hapësirat e përfaqësisë diplomatike dhe/ose konsullore, si dhe dokumentacionin e nevojshëm”, thuhet në Projekt-Ligjin për Shërbimin e Jashtëm.
Referuar projekt-ligjit për Shërbimin e Jashtëm, inspektori diplomatik, mes tjerash, ka kompetencë edhe ta intervistojë personelin e misionit të jashtëm.
Ndërkaq, në rast të evidentimit të ndonjë shkeljeje ligjore, inspektori i rekomandon Ministrit apo Sekretarit të Përgjithshëm, marrjen e masave ndaj diplomatëve.
Por profesori i diplomacisë, Valon Murtezaj, thotë se llupa inspektuese e misioneve të jashtme, nuk duhet të lihet në kompetencën e një zyrtari.
“Më shumë se të grumbullohet pushteti në një individ, në raste të caktuara, vlerësimet e ambasadave të caktuara, nëse është e nevojshme, bëhen nga task-forca apo nga ekipe vlerësuese”, tha Murtezaj.
Projekt-ligji parasheh që specifikat për procedurat e funksionimit të inspektorit, emërimin dhe shkarkimin e tij, të përcaktohen me një rregullore të brendshme të Ministrisë.
Sipas ish-zëvendësministrit të Punëve të Jashtme, këto çështje duhet të sqaroheshin në ligj, meqë ka rrezik të instrumentalizimit politik të inspektorit.
“Duhet të rregullohen me ligj dhe të mos lihen për faza të mëtejshme të rregullimit me akte nënligjore, sepse gjithnjë ka mundësi të keqpërdorimit pastaj të këtyre individëve dhe këtyre procedurave”, tha Murtezaj.
Edhe njohësi i politikës së jashtme, Emir Abrashi thotë se ekziston potenciali për keqpërdorime me këtë post, meqenëse është nismë pozitive.
“Projekt-ligji që është në konsultim publik, i lë shumë hapësirë që sa i përket funksioneve të inspektorit diplomatik, të përcaktohen me Udhëzim Administrativ, dhe këtu ka mundësi edhe për abuzim. Prandaj, në këtë aspekt mendoj që është shumë e rëndësishme që te çështja e inspektorit diplomatik, të përcaktohen detyrat më konkretisht në projekt-ligj”, tha Abrashi.
Përpjekje për ta jetësuar këtë pozitë, pati edhe në kohën kur Hashim Thaçi ishte ministër i Punëve të Jashtme.
