Ministri Krasniqi nis vizitën në ShBA
Ministri i Administrimit të Pushtetit Lokal, Elbert Krasniqi ka filluar vizitën zyrtare në Shtetet e Bashkuara të Amerikës, duke u pritur në takim nga Këshilltari i lartë në Departamentin e Shtetit Amerikan, Paul Pfeiffer. Gjatë këtij takimi Krasniqi dhe Pfeiffer kanë diskutuar për qeverisjen lokale, zhvillimin ekonomik lokal, rezultatet dhe sfidat në transformimin dhe digjitalizimin lokal.
Në veçanti kanë diskutuar për përfundimin e suksesshëm të zgjedhjeve lokale në pjesën veriore të cilat u mbajtën, sipas ministrit Krasniqi, konform Kushtetutës dhe ligjeve të Kosovës si dhe për procesin e konstituimit të organeve të reja komunale.
Ministri Krasniqi ka falënderuar këshilltarin Pfeiffer për mbështetjen e ofruar në rrugën drejt Open Government Partnership (OGP) si dhe për planet e përbashkëta për implementimin e Planit Kombëtar të Veprimit për OGP.
Gjatë kësaj dite pune, ministri Krasniqi ka takuar edhe Janine Garcia, këshilltare e lartë në Byronë për Demokraci dhe të Drejta të Njeriut, për të diskutuar çështjet me interes të përbashkët.
Ministri Krasniqi, ditëve në vijim gjatë qëndrimit në ShBA do të realizoj një numër të takimeve me personalitete dhe intelektual në Amerikë.
