Lëvizja Vetëvendosje është shprehur e sigurt se do ta formojë qeverinë e re, pa përjashtuar mundësinë e krijimit të koalicioneve.
Ministrja e Ekonomisë në largim dhe anëtarja e Vetëvendosjes, Artane Rizvanolli tha të martën se nuk ka alternativë tjetër përpo një qeverie të re me Kurtin kryeministër.
“Sigurisht që në një kohë të tillë, gjithmonë formimi i institucioneve është një pyetje që nuk mund të tejkalohet. Unë mund të them që LVV-ja si forcë politike që tejkalon edhe fuqinë politike të dy partive të tjera që vijnë me radhë, sigurisht që do të formojë Qeverinë Kurti 3 dhe nuk ka asnjë alternativë tjetër se si do të ndodhte ndryshe me këto rezultate të zgjedhjeve”, tha Rizvanolli në një intervistë për RTK Prime në Transmetuesin Publik.
E pyetur nëse LVV-ja do ta formojë qeverinë e vetme, ajo tha se nuk mund të flasë për këtë çështje momentalisht.
“Kjo nuk është diçka për të cilën unë mund të them momentalisht”, u përgjigj ministrja në largim.
Portali Nacionale, të dielën në mbrëmje raportoi se Nisma Socialdemokrate “do ta votojë qeverinë e propozuar nga Lëvizja Vetëvendosje” pas stagnimit në përpjekje për unifikim në një bllok të katër partive opozitare.
Nacionale, duke cituar në një burim të mirëinformuar, raportoi se tre deputetë të Nismës “do t’ia votojnë qeverinë” Kurtit nëse dështon përpjekja opozitare për unifikim, por “pa hyrë në qeveri”.
Sipas raportimit të medias, Limaj tashmë ia ka bërë të qartë këtë qëndrim të saj lidershipit të Partisë Demokratike të Kosovës. Kandidati për kryeministër i PDK-së, Bedri Hamza tha të premten se gjatë javës së kaluar ka zhvilluar negociata me LDK-në, AAK-në dhe Nismën.
Të hënën, Fatmir Matoshi i Nismës tha se çështja e votimit të një qeverie me kryeministër Kurtin nuk është diskutuar brenda partisë.
“Nuk është diskutu kjo temë”, tha Matoshi në një deklarim për Paparacin.
Nisma ka shprehur pakënaqësi me angazhimin e deritashëm të subjekteve opozitare në përpjekje për krijimin e një blloku opozitar, i cili do ta dërgonte Kurtin në opozitë.
Por, Matoshi u bëri apel subjekteve opozitare për dakordim “mes vete sa më parë”.
“NISMA është e pakënaqur me angazhimin e partive të opozitës së deri tashme për të unifikuar qëndrimet për një bashkim të mundshëm dhe ju bëjmë thirrje që të dakordohen mes vete sa më parë”, tha anëtari i Nismës.
Kryeministri në detyrë Albin Kurti tha të dielën se Vetëvendosje synon që të krijojë qeverinë brenda të njejtës ditë kur pritet të konstituohet Kuvendi i Kosovës.
Këtë deklarim, Kurti e ka dhënë para mediave në takimin me rastin e Festës së Fitër Bajramit me myftiun e Bashkësisë Islame të Kosovës, Naim Tërnava.
“Pasi u certifikuan rezultatet, është një seancë ku jepen betimet edhe masnej synojmë një seancë ku zgjedhet edhe kryetari, kryesia e Kuvendit edhe Qeveria qysh e kena bërë edhe herën e kalume për të njëjtën ditë”, tha Kurti.
LVV ka siguruar 48 mandate në kuvend, PDK-ja 24, LDK-ja 20 dhe koalicioni AAK-NISMA tetë (AAK-ja pesë, Nisma tri). Lista Serbe do t’i ketë 9 deputetë, 1 ulëse nga komuniteti serb e ka fituar partia e Nenad Rashiqit.
