Kryeministri në detyrë i Kosovës, Albin Kurti, ka reaguar ashpër pas rrëmbimit dhe plagosjes së një qytetari serb me shtetësi kosovare në Leposaviq, rast që dyshohet të jetë kryer nga xhandarmëria serbe brenda territorit të Kosovës.
Në një deklaratë për media, Kurti ka akuzuar drejtpërdrejt presidentin e Serbisë, Aleksandër Vuçiq, se ka nisur përndjekjen e serbëve të integruar në institucionet e Kosovës, duke i quajtur veprimet e Serbisë si agresive dhe hegjemoniste.
“Fqinji ynë verior, përveç se është agresor është edhe agresiv. Vazhdimisht bën sulme, kërcënime e provokime. Së fundmi është e qartë që Serbia është dorëzuar para Republikës së Kosovës dhe para shqiptarëve. Ajo tash i ka në shënjestër serbët të cilët janë integruar në Kosovë, që punojnë për të mirën e komunitetit serb, dhe të cilët nuk i kanë librezat e partisë së presidentit të Serbisë, Vuçiq atje,” deklaroi Kurti.
Shefi në detyrë i qeverisë theksoi se Serbia është orientuar kah Kremlini, ndërsa Kosova kah vlerat perëndimore.
“Kosova dhe Serbia janë dy shtete fqinje. Kosova është shtet demokratik, me paqe e siguri, me ligjshmëri dhe rend publik, ndërkaq Serbia është shtet autokratik, armiqësor, i orientuar kah veri-lindja, pra nga Kremlini, dhe gjithashtu me aspirata ekspansioniste e hegjemoniste në Ballkan. Ne jemi të orientuar kah Perëndimi, kah Bashkimi Evropian dhe NATO-ja,” shtoi ai.
Nga veriu i Mitrovicës, Kurti kërkoi që Bashkimi Evropian dhe NATO të vendosin sanksione ndaj Serbisë, duke e cilësuar atë si kërcënim për paqen dhe sigurinë në rajon.
“Është e domosdoshme që bashkësia ndërkombëtare, e posaçërisht Bashkimi Evropian dhe NATO-ja, t’i bëjnë trysni Beogradit ta vendosin Serbinë nën sanksione, sepse ajo po i lufton serbët në Kosovë të cilët dëshirojnë të jetojnë në paqe e në liri, për të cilët jemi garant ne si qeveri e Republikës – meqenëse unë nuk jam kryeministër vetëm i shqiptarëve, por edhe i të tjerëve përfshirë serbët që janë rreth 4% të popullsisë në Kosovë,” deklaroi Kurti.
Kryeministri në detyrë pati edhe një thirrje direkte për serbët në katër komunat veriore që të bashkëpunojnë me institucionet e Republikës së Kosovës.
“Kushtetutshmëria, ligjshmëria, paqja e siguria, rendi publik do të jenë cep më cep Republikë sonë, tërë kohën për të gjithë, pa dallim për inat të askujt, por për të mirën publike e qytetare. Andaj edhe organet e Kosovës, si në aspektin e sigurisë ashtu edhe në atë social, do të jenë pranë gjithë qytetarëve, pa diskriminuar apo favorizuar askënd,” u shpreh Kurti për Tëvë1.
Ndërkohë, rasti i rrëmbimit të Milan Vukasinoviqit më 1 nëntor në Leposaviq është duke u hetuar nga organet e rendit në Kosovë.
