PËRGATITI: ARTON HAMITI
Kryeministri Albin Kurti dhe ministri i Bujqësisë Faton Peci, hapen fushatën e korrje-shirjeve në Lipjan. Nga aty, përgëzuan fermerët për punën e bërë teksa premtuan përkrahje te vazhdueshme.
Për disa minuta, eskortën e zëvendësoi me kombajnë. Madje e drejtoi vet.
Kështu, kryeministri Albin Kurti se bashku me ministrin e Bujqësisë, Faton Peci hapen fushatën e korrje-shirjeve në Komunën e Lipjanit.
Nga fshati Suhodoll, Kurti përgëzoi fermerët, teksa tha se fal tyre “kemi bukën tonë në sofrën tonë nga toka jonë”.
“Kishim kënaqësinë që bashkë me ministrin të jemi në këto kombajnat për korrjen e grurit, me ç’rast jemi shumë të lumtur që kemi një verë të jashtëzakonshme sa i përket edhe punës edhe produktit.”
Ndërkaq, ministri i Bujqësisë siguroi se me përkrahjen e Qeverisë, Kosova do të arrijë të mbulojë nevojat bazike me grurë.
“Vetëm për të mbjellat me grurë janë 66 mijë hektarë në gjithë Republikën. Fermeri i Kosovës është më i përkrahuri në rajon, gjitha reformat që i kemi marrë për procedurat, legjislacionin, menaxhimin e financave nuk do të ishin të mundura pa përkrahjen e Qeverisë dhe kryeministrit të vendit”
Fermeri Valbon Vehapi pret rendiment te kënaqshëm nga korrja e grurit.
“Ne sot kemi filluar me korrje, fillimi është i mirë, rendimenti do të jetë i kënaqshëm. Kemi sasi të madhe të autokombajave. Besojmë që rrafshi i Kosovës brenda 3-4 ditëve do ta përfundojë korrjen, pastaj do të nisim me Gollakun”
Gruri është lëndë e parë për prodhimin e miellit dhe si i tillë konsiderohet produkt strategjik për sigurinë kombëtare.
Megjithatë për sigurimin e tij, Kosova varet shumë nga importi. Kryesisht, gruri importohet nga Serbia Kroacia, Austria dhe Maqedonia e Veriut.
