Kreshnik Kaçiu zgjidhet kryetar i Gjykatës Administrative
Këshilli Gjyqësor i Kosovës ka zgjedhur gjyqtarin Kreshnik Kaçiu kryetar të Gjykatës Administrative.
Kaçiu ishte kandidati më i vlerësuar nga Komisioni vlerësues, duke marrë gjithsej 74 pikë. Pas këtij rezultati, Komisioni ia kishte propozuar KGJK-së emërimin e tij në krye të gjykatës së re.
Reklamë
Propozimi është hedhur në votim para anëtarëve të Këshillit, të cilët kanë votuar në favor të zgjedhjes së Kaçiut.
Në garë ishte edhe gjyqtarja Liridona Ajeti-Kajtazi, por ajo nuk e kishte arritur pragun e kërkuar prej 70 pikësh dhe për këtë arsye, nuk ishte propozuar për emërim.
Vlerësimi i kandidatëve është bërë nga Komisioni i përbërë nga Afërdita Bytyqi, kryetare, si dhe Bashkim Hyseni dhe Fahret Vellija, anëtarë. Ndërsa, Ivana Milenkoviq ishte caktuar anëtare rezervë.
Procedura e përzgjedhjes është zhvilluar në bazë të Ligjit për Gjykatën Administrative dhe Rregullores 12/2022, e cila përcakton procedurat për përzgjedhjen e kryetarëve dhe gjyqtarëve mbikëqyrës të gjykatave.
Reklamë
