PËRGATITI: PRANVERA KRASNIQI
Komuna e Prishtinës ende nuk ka e bërë kompensimin e dëmeve për tregtarët, të cilët u dëmtuan nga zjarri i një muaji më parë në Tregun e Gjelbër në Prishtinë. Derisa pronarët ankohen se me këtë veprimtari mbanin familjen, Komuna nuk dha asnjë detaj se deri ku ka shkuar procesi i vlerësimit të dëmeve.
Ejup Dushullovci është njëri prej dymbëdhjetë tregtarëve që nga zjarri i një muaji më parë, humbi një pjesë të konsiderueshme të mallit që shiste në Tregun e Gjelbër në kryeqytet.
Dushullovci, i cili me shitjen e tekstilit, ka mbajtur familjen e tij, ende po pret kompensim për dëmet e shkaktuara.
Pavarësisht që të gjitha dokumentacionet e nevojshme i kishte bërë gati, sipas tij, kërkesa për kompensim nuk u mor parasysh nga komuna.
Në mungesë të kompensimeve, tregtarë të tjerë u detyruan të bëjnë zgjidhje alternative për tejkalim të situatës.
Sipas tregtarëve, askush nuk u interesua për gjendjen e tregut edhe pas zjarrit.
“Ndonëse ka kaluar një muaj prej kur zjarri kishte shkatërruar një pjesë të konsiderueshme të tregut të gjelbër në kryeqytet, dëmet e shkaktuara dhe llumi i tyre janë ende prezentë”.
Për rregullimin e tregut dhe për procesin e vlerësimit të dëmeve që do t’i hapte rrugë kompensimit të të dëmtuarve, askush nga zyrtarë komunalë nuk pranuan të japin detaje. Ndërkaq, hetimet për shkaqet e zjarrit ende po vazhdojnë.
