Ka më shumë se 4 vjet që Rexhep Morina e ka ndarë tokën me vëllezërit e tij. Por nga atëherë, ai ende nuk e ka pronën të regjistruar në emër të tij.
Kryerjen e procedurave të pronësisë thotë se ia ka vështirësuar mungesa e noterëve në Kamenicë, teksa për të shkuar në qytete të tjera thotë se nuk e ka të lehtë.
“Unë kam problem për shkak se gjatë ndarjen me vëllezërit e mi, është gabuar një numër i pronës dhe ka mbetur prona ende në pesë pjesë, d.m.th. në 5 vëllezër, edhe pse është dashur të bartet në pjesën time. Kështu që disa herë kam qenë te noteri, por eja sot, eja nesër dhe ka mbetë”, tha Rexhep Morina, qytetar.
Që qytetarët ta kenë më të lehtë për t’i kryer shërbimet e noterisë, Ministria e Drejtësisë kishte dërguar një noter, por ai punon vetëm një ditë në javë.
Mirëpo, puna prej një dite në javë del të jetë mjaft pak, krahasuar me kërkesat që kanë qytetarët.
“Normal që nuk mjafton vetëm një ditë në javë, se njerëzit kanë punë dhe duhet me shku në Gjilan me i kry, duhet me i lanë punët e me shku te noteri”, tha Afrim Lecaj, qytetar.
“Çdo qytet duhet me pas një noter apo dy, ama jemi qysh jemi”, tha Fisnik Ismajli, qytetar.
Kësisoj, sado e vështirë, si zgjidhje opsionale qytetarëve të Kamenicës u mbetet Gjilani.
Lidhur me atë nëse është në plan që në Kamenicë të punësohet ndonjë noter, i cili do të punojë me orar të plotë, Ministria e Drejtësisë nuk ka kthyer përgjigje.
Sipas odës së noterëve, janë vetëm 51 noterë që punojnë në tërë vendin. /atvlive.tv
Edicionin Qendror të lajmeve në ATV e gjeni në videon më poshtë:
