Christopher Hill e ka fajësuar sërish Qeverinë e Kosovës për trajtimin e komunitetit serb dhe mungesën e përparimit në dialogun e Brukselit.
Ambasadori amerikan në Beograd, Christopher Hill, tha të premten se nuk e përjashton mundësinë e ndryshimit të politikës së SHBA-së ndaj Serbisë pas kthimit të Presidentit të sapozgjedhur Donald Trump në Shtëpinë e Bardhë.
Para se të largohet nga Beogradi, me mandatin e tij që përfundon brenda ditësh, Hill tha për RTS se është “optimist për të ardhmen e marrëdhënieve SHBA-Serbi”.
“Është vërtet e vështirë të thuhet (nëse do të ketë një ndryshim politikash). Mendoj se administrata e ardhshme e Trump, pra një pjesë e stafit të saj, ka përvojë në punën me Serbinë, ndaj nuk do të përjashtoja një ndryshim”, tha Hill,
Diplomati amerikan, i cili ishte ambasador në Maqedoninë e Veriut, Poloni dhe Kore të Jugut, tha se është shumë i zhgënjyer me situatën në Kosovë dhe se Qeveria e Kosovësështë përgjegjëse për një pjesë të madhe të mungesës së progresit në dialogun e Brukselit.
“Kosova duhej të bënte disa gjëra, si mbrojtja e popujve të ndryshëm, përfshirë edhe atë serb. Më duhet të them se më duket shumë zhgënjyese sa larg kemi arritur në Kosovë. Është shumë e qartë se kjo është një situatë e pakënaqshme”, tha Hill.
Ai shprehu shpresën se do të ketë “përpjekje më të madhe” në dialog, duke thënë se Bashkimi Evropian “po përpiqet shumë” dhe se ka “një sfidë të konsiderueshme” përpara.
“Unë mendoj se shumë prej nesh janë shumë të zhgënjyer me mungesën e përparimit në dialogun e Brukselit. Dhe shumë arsye për atë dështim, për mendimin tim, janë në anën e Qeverisë së Kosovës. Varet nga ne që të mbështesim Evropën dhe të shohim nëse mund të bëhet ndonjë përparim. Por nuk jam i kënaqur me atë që është arritur”, tha ai.
