Hapja e vendvotimeve, Kosova voton për kryetarët e 38 komunave

Vendvotimet janë hapur (para pak minutash) sot në orën 07:00 të mëngjesit dhe do të qëndrojnë të hapura deri në orën 19:00.

Qytetarët e Republikës së Kosovës po ushtrojnë sot të drejtën e tyre kushtetuese për të votuar, në kuadër të zgjedhjeve të rregullta lokale që po mbahen në të 38 komunat e vendit.

Numri i qytetarëve me të drejtë vote në vendvotime, sipas të dhënave të KQZ-së është 2 milionë e 69 mijë e 98 votues. Prej tyre, nga jashtë Kosovës janë regjistruar për votim 43 mijë e 993 qytetarë me të drejtë vote.

Procesi zgjedhor do të organizohet në 938 qendra të votimit me gjithsej 2 mijë e 625 vendvotime, prej të cilave 910 qendra votimi për votimin e rregullt me 2 mijë e 571 vendvotime dhe 38 qendra votimi për votim me kusht me gjithsej 54 vendvotime.