Gazetari i ATV-së, Armand Hoti, në një lidhje të drejtpërdrejtë nga Kuvendi i Kosovës, zbuloi zhvillimet e fundit para nisjes së seancës konstituive. Ai tha se disa nga figurat kyçe politike tashmë kanë hyrë në objekt, ndërsa jashtë Kuvendit janë vendosur përfaqësues të Organizatës së Veteranëve të Luftës.
Sipas gazetarit, Fatmir Limaj, kryetari i Nismës Socialdemokrate, u shpreh shkurtimisht se shpreson që sot Kuvendi të konstituohet.
“Fatmir Limaj tha që, ishte i shkurtër pra në prononcimin e tij, tha që shpreson që sot të konstituohet Kuvendi”, tregoi gazetari Hoti.
Ndërkohë, edhe Arben Gashi nga LDK përsëriti qëndrimin e partisë së tij se nuk do të votojnë raportin për verifikimin e mandateve pa dorëheqjet zyrtare të anëtarëve të Qeverisë.
“Arben Gashi potencoi se nuk e votojnë raportin pa vënë dorëheqje, ashtu siç po e kërkojnë ata pra, kryeministri në detyrë Albin Kurti”, tha Hoti.
Duke përshkruar atmosferën para Kuvendit, gazetari shtoi se përveç mediave dhe deputetëve, në hyrjen tjetër janë vendosur anëtarë të OVL-UÇK-së, të cilët po kërkojnë nga deputetët e rinj të nënshkruajnë një betim për drejtësi, që përfshin kërkesa kundër Gjykatës Speciale.
“Janë të vendosur disa nga pjesëtarët e Organizatës së Veteranëve të Luftës, të cilët po kërkojnë nga deputetët që ta nënshkruajnë një betim ku kërkohet që të merren disa masa ndaj Gjykatës Speciale”, raportoi gazetari Hoti.
Më shumë detaje i gjeni në videon më poshtë:
