Fakulteti i Shkencave Sociale me rastin e Ditës Ndërkombëtare të Poezisë ka organizuar një bashkëbisedim me poetë për artin e poezisë dhe librin, në Teatrin Kamertal të Kolegjit AAB.
Dy poetët e mirënjohur njëherazi edhe profesorët Agim Vinca dhe Bujar Tafa para studentëve folën për rëndësinë që ka poezia dhe kultivimi i saj.
“Arti e zbut shpirtin dhe zbukuron jetën, andaj poezia është vështirë të përkufizohet por unë them se poezia është sintezë e ndjenjës, mendimit dhe shprehjes së bukur, pra mendoj që ky është një nga përkufizimet e mundshme të artit poetik”, tha Vinca ndër të tjera.
Kurse profesori dhe poeti Bujar Tafa foli për rëndësinë që ka leximi i poezisë dhe ndikimin që bart te studentët apo të rinjtë.
“Leximi i poezive nga të rinjtë ka një ndikim të madh në zhvillimin emocional, intelektual dhe aspektin kreativ. Pastaj zhvillon edhe aftësitë e komunikimit, nxit empatinë dhe ka ndikim në pasurimin e ndjenjave dhe për këtë arsye shoqëria duhet të krijoj politika për të rritur leximin”, tha Tafa.
Për kontributin e madh në poezi foli edhe poeti Lulzim Tafa, i cili para pak kohësh u nderua me titullin më të lartë “Oficer i Urdhërit Kombëtar të Letrave dhe Arteve” nga ambasadori francez në Kosovë.
Ai tha se është rritur me poezinë dhe vazhdon të jetoj me të duke falënderuar profesorin Agim Vinca për ndikimin e madh që ka pasur në krijimtarinë e tij. Ndërsa titullin e pranuar nga Ambasada Franceze në Kosovë e cilësoi si nderimin më të madh për letërsinë dhe për të personalisht.
Në fund poetët Agim Vinca, Bujar Tafa dhe Elizabetë Qarri recituan disa poezi të shoqëruara me tinguj pianoje të ekzekutuara nga Artemida Qarri.
