Përgatiti: Driton Sadiku
Orët mësimore i patën më të shkurtra se zakonisht.
Nxënësit e shkollës fillore Milah Grameno në Fushë-Kosovë, të enjten, dolën me herët nga shkolla, për shkak të festës së 7 marsit.
Vendimi qe i shkollës, ndërkaq, arsye thonë se është organizimi i aktiviteteve për ditën e mësuesit.
“Nuk është në koordinim me DKA-në, është vendim i shkollës, sepse programi do të mbahet këtu në hollin e shkollës. Orari mësimor është caktuar që të mbahet i shkurtuar për arsye se hapësira nuk na lejon që mësimi të mbahet në orarin e gjatë. Për këtë arsye është shkurtuar orari për ditën e sotme dhe mbahet 30 minuta ora”, tha Mimoza Kryeziu, pedagoge.
Por jo vetëm, shkurtimi i orëve për festën e 7 Marsit, pothuajse është bërë praktikë në shumë shkolla.
Andaj njohës të arsimit e shohin të paarsyeshme që nxënësve t’u cenohet e drejta për mësim, për shkak të festave, që madje nuk konsiderohen zyrtare.
“Përderisa 7 marsi nuk është festë zyrtare në asnjë moment këto nuk duhet me qenë arsye për me e cenu procesin mësimor, unë e kuptoj fleksibilitetin që iu nevojitet mësimdhënësve, mirëpo në të njëjtën kohë jam shumë i bindur që edhe mësimdhënësit e kuptojnë domosdoshmërinë mbajtjes së procesit mësimorë si përgjegjësi që e kanë karshi nxënësve”, tha Rinor Qehaja nga instituti “Ed Guard”.
Sidoqoftë, Ministria e Arsimit nuk u përgjigj për ATV-në lidhur me vendimet krye në vete nga ana e shkollave, për shkurtim të orarit mësimor.
7 marsi konsiderohet si dita e mësuesit, meqë shënon hapjen e shkollës së parë shqipe më 1887 në Korçë.
Më shumë detaje i gjeni në Edicionin Qendror të lajmeve në videon më poshtë: