Gazetarja Ardita Behluli, në emisionin COMPASS në ATV, tha se në Luginën e Preshevës ka shumë policë shqiptarë të kualifikuar, por pozitat udhëheqëse në institucionet e rendit vazhdojnë të mbahen nga serbët.
Ajo tha se edhe pse shqiptarët kanë grada të larta arsimore dhe përfaqësojnë profesione deficitare, nuk u jepet hapësirë në pozita vendimmarrëse.
“Pikërisht në institucionet e rendit, në organet e rendit, me theks të veçantë në stacionin policor, ne kemi shumë policë që janë të kualifikuar me gradat më të larta të nivelit arsimor, e që ndoshta edhe janë profesione deficitare, që shumë pak kadetë të nacionalitetit serb, që kanë mbaruar studimet në Beograd, i zotërojnë. Por ata zënë një vend pune, një pozicion shumë të thjeshtë, përkundër asaj se në pozitë të lartë udhëheqëse mbeten të jenë serbët. Dhe normalisht kjo është një shqetësim pa rezervë”, tha Behluli.
Ajo shtoi se pavarësisht reagimeve të liderëve lokalë dhe raporteve ndërkombëtare, diskriminimi ndaj shqiptarëve në Serbi vazhdon, madje me heshtje edhe nga faktori ndërkombëtar.
“Këto shqetësime i ka shprehur edhe deputeti, i shprehin herë pas here edhe kryetarët e komunave, edhe liderët e partive. Por edhe më tutje kërkesat e shqiptarëve të Luginës së Preshevës po hasen në vesh të shurdhër. Ajo çfarë është shqetësuese është se kemi edhe një heshtje nga faktori ndërkombëtar. Shumë rrallë kemi reagime apo reflektim nga korri diplomatik, nga ambasadat e akredituara në Serbi. Në fund të vitit 2024, edhe Këshilli i Evropës i ka tërhequr vërejtje presidentit Vuçiq për diskriminimin e pakicave, posaçërisht të shqiptarëve që jetojnë në Serbi”, u shpreh gazetarja Ardita Behluli.
Deklaratën e plotë të Ardita Behlulit në COMPASS, e gjeni në videon më poshtë:
