Gazetarja Ardita Behluli, në emisionin COMPASS në ATV, tha se gjuha e urrejtjes ndaj shqiptarëve në Serbi është e përhapur në të gjitha nivelet, duke filluar nga Parlamenti e deri te mediat dhe institucionet shtetërore.
Sipas saj, shqiptarët në Luginën e Preshevës përballen me diskriminim sistematik dhe përçmim të vazhdueshëm, i cili manifestohet publikisht dhe institucionalisht.
“Gjuha e urrejtjes e kemi gjithkund – përpos në media, edhe në institucione. Në mediat nacionale dhe ato private, në debatet televizive, shohim mllefin që nxjerrin mysafirët, personalitete të caktuara në studio, tash i drejtohen shqiptarëve. Ajo që është më e rëndë dhe më e keqja është se fillimisht e shohim në Parlamentin e Serbisë karshi shqiptarëve. Çdo herë ku përmenden shqiptarët, ata në gjuhën e tyre nuk i quajnë ashtu siç duhet, por me një urrejtje duke i thënë ‘shqiptari’”, tha Behluli.
Ajo tha se edhe përkundër raportimeve ndërkombëtare dhe reagimeve të liderëve shqiptarë në Serbi, shteti serb vazhdon të mos e marrë seriozisht këtë çështje.
“Në fundin e vitit 2024 kishim edhe Raportin e Këshillit të Evropës, të cilët i kanë tërhequr vërejtje presidentit Vuçiq sa i përket diskriminimit të pakicave nacionale, e posaçërisht të shqiptarëve që jetojnë në Serbi. Por Vuçiq nuk ka pasur kohë të merret me këtë çështje – për të, pozicioni i shqiptarëve në Luginë të Preshevës duket shumë pak shqetësues, sepse ai tani po merret me problemet e veta që ia ka krijuar vetes populli i tij”, deklaroi gazetarja Ardita Behluli.
Deklaratën e plotë të Ardita Behlulit në COMPASS, e gjeni në videon më poshtë:
