Bashkimi Evropian dhe Mbretëria e Bashkuar kanë miratuar sanksione të reja kundër Rusisë për shkak të luftës së saj në Ukrainë.
Sanksionet e Bashkimit Evropian janë të përqendruara te “flota në hije” e anijeve transportuese të naftës, shkelja e të drejtave të njeriut dhe kërcënimet hibride, tha kryediplomatja e BE-së, Kaja Kallas, raporton gazeta “The Guardian”.
Në rrjetin X, zyrtarja e lartë evropiane shkroi: “BE-ja e ka miratuar pakon e saj të 17-të të sanksioneve kundër Rusisë, duke vënë në shënjestër gati 200 anije të flotës në hije. Masat e reja gjithashtu i adresojnë kërcënimet hibride dhe të drejtat e njeriut.”
Shefja e politikës së jashtme të BE-së paralajmëroi se blloku është duke shqyrtuar edhe sanksione të tjera. “Më shumë sanksione janë në procedurë. Sa më gjatë që Rusia e vazhdon luftën, aq më e fortë kundërpërgjigjja jonë” – shkroi ajo.
Qeveria britanike, ndërkohë, njoftoi 100 sanksione të reja kundër Rusisë. Këtu përfshihen ushtria ruse, sektorët financiarë dhe të energjisë dhe ata që po e kryejnë “luftën e Putinit me informata kundër Ukrainës”.
Në njoftimin për shtyp thuhet se Britania dhe partnerët e saj “gjithashtu janë duke punuar për ta shtrënguar tavanin e çmimit të naftës, duke i kufizuar më tej të hyrat jetike nga karburantet për makinerinë luftarake të Putinit”.
Presidenti ukrainas, Volodymyr Zelensky, e akuzoi Rusinë se po mundohet që të blejë kohë për ta vazhduar luftën. Mendim të njëjtë pati edhe ministri i Mbrojtjes i Gjermanisë, Boris Pistorius./Nacionale
