Arabia Saudite thotë se organizimi i shkuarjes në haxh për besimtarët myslimanë të Kosovës i takon vetëm BIK-ut

Bashkësia Islame e Kosovës ka njoftuar se Myftiut Naim Tërnava ka marrë një letër nga Ministri i Ministrisë së Haxhit dhe Umres së Arabisë Saudite, Teufik bin Feuzan bin Rebiah, i cili ka njoftuar se organizimi i shkuarjes në haxh i takon vetëm BIK-ut.

Në njoftim thuhet se nëse një gjë e tillë nuk zbatohet, atëherë do të ketë gjoba dhe ndalim hyrje në Arabinë Saudite.

“Në këtë letër thuhet se Këshilli i Lartë i Dijetarëve të Mbretërisë së Arabisë Saudite, ka nxjerrë një fetva drejtuar të gjithë myslimanëve për ndalesën e kryerjes së haxhit pa leje, kjo me qëllim të realizimit të objektivave të së mirës së përgjithshme dhe të mos dëmtimit të haxhilerëve të rregullt”.

“Ai ka njoftuar se në rast të mos zbatimit të kësaj fetvaje, do të ketë pasoja me gjobë për të gjithë ata që tentojnë të kryejnë haxhin pa leje, si dhe ndalim të hyrjes në Mbretërinë e Arabisë Saudite për një afat të pacaktuar”, thuhet në njoftimin e BIK-ut.